Feedback ပြန်အသိပေးခြင်း

Feedback ပြန်အသိပေးခြင်း google

လုပ်လို့ကိုင်လို့ရတာတွေ အကုန်လုံး သုံးစွဲသူ သိဖို့ သိသာထင်ရှားနေတယ်။

အဲဒီလိုဆိုရင် အဲဒီကိရိယာကို သုံးစွဲဖို့ လွယ်ကူနေစေမှာ ဖြစ်ပါတယ်။

အခြေခံသဘောတရားတွေက ရိုးရှင်းတယ်။ ဒါပေမဲ့ မသိလို့ ဒီဇိုင်းထုတ်တာမှာ ထည့်မစဉ်းစားမိဘူး။ သိသော်လည်း အရေးမလုပ်မိဘူး။ ဒီဇိုင်းထုတ်တဲ့သူက သိပါသော်လည်း သူ့ဆရာသမားတွေက မသိလို့ ဆားဝင်ခတ်တော့ ငန်ကုန်တယ်။

စသဖြင့် အကြောင်းကြောင်းတွေကြောင့် ဒီဇိုင်းမှာ အဲဒီကောင်းခြင်းလက္ခဏာတွေ ပါမလာတော့ဘူး။

အဲဒီကောင်းခြင်းလက္ခဏာတွေအပြင် နောက်ထပ် အရေးကြီးတဲ့အချက်က Feedback

တစ်ယောက်ယောက်ကို ခိုင်းလိုက်တယ်။ သတင်းပြန်မပို့ဘူး။ အကြောင်းမပြန်ဘူး။ ခိုင်းလိုက်တာ လုပ်နေတာလား၊ မလုပ်ဘူးလား၊ လုပ်ပြီးသွားပြီလား ဘာမှ မသိရဘူး။ အဲဒီမတင်မကျ ဝေဒနာမျိုးကို ဒီဇိုင်းက မပေးဖို့ အရေးကြီးတယ်။

ဓာတ်လှေကားနဲ့ တက်ဖို့ စောင့်နေကြတယ်။ ဓာတ်လှေကားကို အပေါ်တက်ဖို့ ခေါ်တဲ့ ခလုတ်ကို နှိပ်ထားပြီးသားမို့ မီးလင်းပြနေတယ်။ ဒါပေမဲ့ ဓာတ်လှေကားက တော်တော်နဲ့ ရောက်မလာရင် ဓာတ်လှေကား ဘယ်အထပ်မှာ ရောက်နေသလဲ ပြသမှု မရှိတဲ့အခါ အဲဒီခလုတ်ကို ထပ်နှိပ်တယ်။ နှစ်ချက်သုံးချက် ဆင့်နှိပ်ပြီး သေချာအောင် နှိပ်တယ်။ အဲဒီလို စိတ္တဇ ကျွန်တော်တို့မှာ ရှိနေတယ်။

 

ဓာတ်လှေကား ဘယ်အထပ်မှာ ရောက်နေသလဲဆိုတာ ဂဏန်းကို မီးလင်းပြီး ပြသပေးနေရင်တော့ စောင့်နေရတဲ့သူတွေက သြော် ဆင်းလာနေပြီ။

4 လို့ မီးလင်းပြတာတွေ့တော့ လေးထပ်ရောက်ပြီ။

4 လို့ မီးလင်းပြနေပြီး 3 ကို မပြရင် ဟော ရပ်နေပြီ။ လူတက်ဆင်း လုပ်နေပြီ။

3 လို့ မီးလင်းပြရင်တော့ ဟော သုံးထပ်ရောက်ပြီ စသဖြင့် တွေးဆလို့ ရသွားတယ်။ သူတို့တွေးဆတာ မှန်ကန်တယ်လို့လည်း ယုံကြည်တယ်။ ဒီတော့ ခလုတ်ကို ထပ်မနှိပ်တော့ဘူး။ စိတ်ချလက်ချ စောင့်နေတယ်။

အဲဒါ အချိန်နဲ့အမျှ၊ အချိန်နဲ့ တစ်ပြေးညီ feedback ပြန်အသိပေးခြင်းတွေ ရနေတာဖြစ်ပါတယ်။

feedback ပြန်အသိပေးခြင်း ဆိုတာ အဲဒီလိုပဲ ဖြစ်နေရမယ်။

●  feedback ပြန်အသိပေးခြင်းက ချက်ချင်းပေးရမယ်။ တစ်စက္ကန့်ရဲ့ တစ်ဆယ်ပုံတစ်ပုံလောက် နှောင့်နှေးတယ်ဆိုရင်ပဲ သုံးစွဲသူ အနေခက်တယ်။ အဲဒီလောက် အရေးကြီးပါလျက် ဒီဇိုင်းထုတ်တာတွေ အများအပြားတို့မှာ feedback ပြန်အသိပေးခြင်း ကို လျစ်လျူပြုထားကြတယ်။

feedback ပြန်အသိပေးခြင်းက သိပ်ကြာလွန်းနေရင် များသောအားဖြင့် လူတွေက လက်လျှော့လိုက်ကြတယ်။ တခြား လုပ်စရာရှိတာတွေကို ပြောင်းလုပ်တယ်။

feedback ပြန်အသိပေးခြင်း မလာတာ လူတွေကို စိတ်ဒုက္ခပေးတယ်။ အဲဒီ စိတ်ဒုက္ခမျိုးကို လူတွေက ကြာကြာသည်းမခံနိုင်ကြဘူး။ ဒီတော့ တခြားရောက်သွားတယ်။ လုပ်ပေးလို့ပြီးတဲ့အခါ စောင့်နေတဲ့သူက မရှိတော့ဘူး။ လုပ်ပေးထားသမျှ အလကား ဖြစ်ကုန်ရတာတွေလည်း ရှိတယ်။

●  feedback ပြန်အသိပေးခြင်းကို ပေးရင် သတင်းပို့တာ ဖြစ်ရမယ်။ အသိပေးရုံမျှ မရဘူး။ ဓာတ်လှေကား ရွေ့နေတာကို မှိတ်တုပ်မှိတ်တုပ်မီးနဲ့ ပြပေးနေတယ်ဆိုပါစို့။ စောင့်နေတဲ့သူက ဓာတ်လှေကား ရွှေ့နေတာပဲ သိရမယ်။ အပေါ်တက်နေတာလား၊ အောက်ကို ဆင်းလာနေတာလား။ ဘယ်နှထပ်ကို ရောက်ပြီလဲ ဘာမှ သတင်းမရဘူး။ အဲဒီလို အသိပေးတဲ့ ဖိဘက်မျိုးကို မသုံးအပ်ဘူး။ ဘာမှ မရှိတာထက် တစ်ခုခုရှိတာက တော်သေးတာပေါ့လို့ နှစ်သိမ့်ဖို့ မကြံရွယ်ပါနဲ့။ လူတွေက လက်ခံမှာ မဟုတ်ဘူး။

●  feedback ပြန်အသိပေးတာ သိသာထင်ရှားရမယ်။ မြင်ဖို့ တွေ့ဖို့ လွယ်ရမယ်။ အသံနဲ့ပေးတယ်ဆိုရင်လည်း အသံက ကြားသာရမယ်။ ပြတ်သားကြည်လင်ရမယ်။

●   ညံ့ဖျင်းတဲ့ feedback ပြန်အသိပေးခြင်းဟာ ဘာfeedback ပြန်အသိပေးခြင်းမှ လုံးဝမရှိတာထက် ဆိုးတယ်။ feedback ပြန်အသိပေးနေတာကို နားလည်ဖို့ သိဖို့ လိုက်လုပ်နေရတဲ့ သုံးစွဲသူ စိတ်ကသိကအောက် ဖြစ်တယ်။ သောကပွားတယ်။

●  feedback ပြန်အသိပေးတာ တော်ရုံတန်ရုံပဲ ကောင်းတယ်။ များလွန်းရင် သုံးစွဲသူ စိတ်တိုတယ်။

ယာဉ်မောင်းကို နောက်ခုံက ထိုင်နေတဲ့ အမျိုးသမီးက ပြောဆိုနေတာမျိုးဟာ feedback ပြန်အသိပေးတာ များလွန်းနေတာအတွက် အကောင်းဆုံး ဥပမာပဲ။ အဲဒီအမျိုးသမီးက နောက်ခုံမှာ ထိုင်ပြီး ပါးစပ်နဲ့ ကားမောင်းနေတာကို ယာဉ်မောင်းက သည်းခံနေရတယ်။ သူပြောနေတာ မမှားဘူး။ များသောအားဖြင့် အမှန်တွေချည်းပဲ။ ဒါပေမဲ့ ကြိမ်ရေများလွန်းနေပြီး အဆက်မပြတ် ပြောဆိုပေးနေတဲ့အခါ ကူညီရာ မရောက်တော့ဘူး။ နှောက်ယှက်ရာ ရောက်သွားတယ်။ ယာဉ်မောင်း အာရုံတွေ နောက်ကုန်တယ်။ ဒီတော့ ထုတ်ပေးထားတဲ့ ဒီဇိုင်းမှာ feedback ပြန်အသိပေးတာ များလွန်းနေရင် နောက်ခုံမှာထိုင်ပြီး ကားမောင်းတဲ့သူ backseat driver နဲ့ မောင်းနေရတဲ့သူလိုမျိုး သုံးစွဲသူရဲ့ စိတ်မှာ ခံစားနေရမယ်။

 

●  feedback ပေးလိုက်လို့ သိသွားပြီးရင် ထပ်ပြီး feedback ကို မပေးမိစေနဲ့။ သိပြီးသားကို လာပြောရင် လူ့စိတ်က နားမ၀င်ဘူး။ သိပြီးသားကို ဆရာလာလုပ်တယ်လို့ ချဉ်တယ်။ သိပြီးသားကို ထပ်ခါထပ်ခါ လာပြောနေတယ်လို့ စိတ်မှာ ခါးတယ်။

●  feedback ကို ဒီဇိုင်းမှာ ထည့်ပြီး ထုတ်ဖို့ လုပ်တဲ့အခါ ဒီဇိုင်းသမား ကြုံရတဲ့ အတားအဆီးက ဘတ်ဂျက် ဖြစ်ပါတယ်။ ကုန်ကျစရိတ်တွေ တက်ကုန်မှာဆိုတော့ မတတ်နိုင်ဘူး။ အဖြစ်လောက်ပဲ ထည့်ပေးလိုက်ရတာမျိုးရှိတယ်။ အညံ့စား feedbackနဲ့ သုံးစွဲသူကို ချွေးသိပ်တယ်။ နှစ်သိမ့်တယ်။ ဈေးအပေါဆုံးကို ရွေးသုံးရတယ်။ ဈေးအသက်သာဆုံး နည်းလမ်းကို ရှာကြံသုံးစွဲရတယ်။ အဲဒါကြောင့် ကိရိယာတွေမှာ အမှားအယွင်းရှိလို့ feedback ပေးရင် မီးမှိတ်တုပ်မှိတ်တုပ်ဖြင့် အချက်ပြတာ၊ အသံတစ်မျိုး မြည်ပြတာလောက်ပဲ ပါလေ့ရှိတယ်။

●  Feedback ပြန်အသိပေးခြင်းကို ဒီဇိုင်းမှာ ထည့်တဲ့အခါ ကြိုတင်ကြံဆချက် အစီအစဉ် ရှိရမယ်။ အသိပေးခြင်းမှာ လုပ်ကိုင်မှာတွေကို အသေအချာ ဖြစ်စေရမယ်။ မသိမသာနဲ့ သိသိသာသာ နှစ်မျိုးခွဲခြား သတ်မှတ်ပေးထားရမယ်။ အရေးမပါတောတွေကို မသိမသာဖြင့် ပြန်အသိပေးရမယ်။ အရေးပါတာကိုတော့ သိသိသာသာ ပြန်အသိပေးရမယ်။

ဓာတ်လှေကားနဲ့ တက်မလို့ စောင့်နေတဲ့သူတွေကို ရောက်ဆဲနေရာအထပ်ကို ဂဏန်းဖြင် မီးလင်းပြပြီး အသိပေးနေတယ်။ မြားက တက်နေတာလား ဆင်းနေတာလား ပြနေတယ်။ စောင့်နေတဲ့သူက စိတ်ဝင်စားရင် ပြသပေးနေတာကို ကြည့်လိမ့်မယ်။ အရေးမလုပ်တဲ့သူက ဖုန်းပွတ်နေမယ်။ ဓာတ်လှေကားက စောင့်နေတဲ့သူတွေ ရှိနေတဲ့အထပ်ကို ဆိုက်ရောက်တဲ့အခါ တင်း ... တောင် ဆိုပြီး အသံမြည်ပေးပြီး သိသိသာသာ အသိပေးလိုက်တယ်။ ဖုန်းပွတ်နေတဲ့သူက အသံကြားပြီး ဓာတ်လှေကား ရောက်ပြီဆိုတာ သိမယ်။ အဲဒီလို မဟုတ်ဘဲ တစ်ထပ်ကို ရောက်တိုင်း တင်းတောင်နေရင် နားငြီးလာမယ်။ ကိုယ့်အထပ်ရောက်လို့ တင်းတောင် မြည်တာလား၊ တခြားအထပ်လားဆိုတာ သိရအောင် လုပ်နေရလိမ့်မယ်။

 

●  Feedback ပြန်အသိပေးခြင်းတွေဟာ လိုတာထက် မပိုအပ်ဘူး။ မသိမသာ ပေးရမှာကို သိသိသာသာ ပေးနေလို့ မဖြစ်ဘူး။ အသိပေးချင်တဲ့ အမျိုးအစား တစ်ခုနဲ့တစ်ခု အတူတူ ဖြစ်မနေသင့်ဘူး။ ဘယ်ဟာက ဘာကို အသိပေးတာလည်း တန်းသိအောင် စီစဉ်ပေးထားရမယ်။

●  ပြန်အသိပေးခြင်းဟာ မပါမဖြစ် လိုအပ်တဲ့အရာ၊ ဒါပေမဲ့ မှန်မှန်ကန်ကန် စီစဉ်ပေးရမယ်။ လျော်ကန်သင့်မြတ်ရမယ်

 

ict guide


Read 86 times
Rate this item
(0 votes)